16TH SUNDAY IN ORDINARY TIME B

REST!

Karong umaabot lunes July 20, 2015, ang tanang pari sa tibuok Diocese sa Malaybalay magahimo sa among retreat, gitawag namo kini ug Annual Retreat. Dili lamang kini basta basta nga retreat kondili usa kini sa paagi sa pagpahulay tungod sa daghang mga trabaho nga among naagian ug pagpamalandong sa tanan nga among nabuhat sa tibuok tuig. Kini usab usa ka pagpangandam pag-usab alang sa umaabot pa namo nga pagserbisyo sa katawhan nga gisangon kanamo sa Dios. Tungod niini ako kamong gihagit sa pag-ampo alang sa tanang kaparian aron magmalampuson ang among ipahigayon nga annual retreat.

Sa atong ebanghelyo karong adlawa atong nahibal an nga ang mga tinun-an gikan sa misyon nga gihatag kanila sa Dios ug mitaho sila kang Hesus sa mga accomplishments nga ilang nahimo. Human sila makabuhat niini, giingnan sila ni Hesus sa pag-adto sa deserto aron sa pagpahulay. Sila gipinahan ni Hesus sa pagpahulay siguro tungod sa kakapoy sa ilang panaw. Ang pagpahulay sa mga apostoles importante alang sa Ginoo tungod kay nasayod man siya nga aduna pay daghan nga trabaho nga nagpaabot kanila.

Ang pulong pagpahgulay sa ingles  “rest” from Latin rēstāre, from re- + stāre to stand. Re is a prefix, occurring originally in loanwords from Latin, used with the meaning “again” or “again and again” to indicate repetition. Rest meaning to say is to stand again and again. Mao kini ang gusto nga mahitabo ni Hesus ngadto sa iyang mga tinun-an. Kinahanglan gayud nga makapahulay sila aron sila makapadayon sa daghan pang mga misyon nga isangon kanila.

Daghan kaayo ug panahon sa atong kinabuhi nga daw kita gikapuyan na. gikapuyan kita diha sa atong pagtrabaho aron mabuhi ang pamilya. Usahay gikapuyan usab kita diha sa pag atiman sa tong tagsatagsa ka pamilya o gikapuyan ba kaha kita diha sa atong kahimtang.

Ang kakapoy makabalda sa atong pagpadayon sa sakto nga trabaho. Sama pananglitan kon ikaw walay tarong ug pahulay sa gabii unya daghan pa gayud ka ug trabaho pagka ugma, siguro gayud nga maapektuhan ang imong trabaho tungod kay wala naman gayud ikaw’y igong kusog tungod sa kakapoy. Usahay ang kakapoy makabungkag usab ug relasyon diha sa pamilya. Tungod sa kakapoy dili na hinoon maatiman ang pamilya. Mutugot ba kamo nga kini mahitabo diha kaninyo? Dili gayud!

Busa, ang giingon sa atong Gino sa atong ebanghelyo karon “pahulay sad oi!” buot niyang ipasabot, tan awa ug pamalandungi ang imong nabuhat sa tibuok adlaw o tibuok bulan. Nakaayo ba kini kanimo ug sa imong pamilya? Wala ka bay nabanggaan o nadaut nga relasyon diha sa imong pagpaningkamot? Pahulay aron ikaw makapadayon sa imong panaw. Mura ba ug sa motor pa, pa change oil pod! Aron ka makadagan ug layo layo.

Isa sa paagi sa pagpahulay mao ang akong gisugilon sa sinugdanan. Adunay uban gusto nga magretreat, adunay uban usab gusto magbakasyon sa mga mamingaw nga dapit. Kon unsa man atong buhaton, ang importante nga imong mabaliktanaw ang imong nabuhat ug aron ikaw makapadayon pa imong mga buhaton pa!

Gikapoy naka? Pahulay sa!