23RD SUNDAY IN ORDINARY TIME YEAR B

TABAAANG!

Introduction: (make a movement or action without saying any words to explain something. Allow yourselves to portray a deaf and mute person.)

Mao kini ang kasagara nga buhaton sa mga amang ug bungol nga tawo aron sila mapaminaw ug maka paambit sa ilang gustong isulti. Lisod kaayo silang sabton ilabi na kon ikaw wala maanad sa pagpakig estorya sa mga tawo nga sama kanila. Usahay maka ingon kita, “kalooy usab niining mga tawhana, gihikawan sa pagsulti ug sa pagpaminaw”. Ang kalibutan sa mga buta ug bungol hilom, bisan gani ang huyuhoy sa kahanginan dili nila madunggan.

Greetings!

Mga igsoon, ang atong ebanghelyo karong adlawa nagsulti sa usa ka amang ug bungol nga tawo nga giayo ni Hesus. Tungod niini maayo na siyang musulti ug maka dungog na. atong Makita sa atong ebanghelyo ang kagustuhan sa mga tawo nga mamaayo ang ilang higala tungod kay ila gayud nga gidala siya ngadto sa atubangan ni Hesus. Si Hesus usab nagpakita sa ritual nga iyang gibuhat sa tawo pinaagi sa pagkulkog sa iyang dalunggan ug iyang dayon gituthuan ang iyang mga kamot ug gihikap ang dila sa tawo. Kining ilang kadasig nga mamaayo ang amang ug bungol nga higala maoy atong pamalandungan karon.

Apan kadiyot lamang! Dili ba nga kita usab mahisama sa amang ug bungol bisan pa ug kabalo kita mosulti ug maminaw? Susama gayud kita sa amang ug bungol kon kita dili makabalo maminaw sa mga tawo nga nanginahanglan kanato. Susama gayud kita sa amang sa wala pagpakabana sa sitwasyon sa atong katilingban. Apan dili pa ulahi ang tanan! Aduna pay dakong kahigayunan nga manginlabot sa panghitabo sa atong katilingban.

Ang kadasig sa mga tawo nga nagdala sa bungol ug amang nga tawo ngadto kang Hesus nagpakita sa ilang pagsalig kang Hesus ug ang dako nilang paghigugma sa maong tawo. Sila mismo miduol nga maisugon ngadto sa Dios aron sila mahatagan sa ilang gikinahanglan. Mao usab unta kini ang atong buhaton, atong ipakita ang atong dakong pagsalig sa Dios aron kita dili mahadlok sa pagpakabana sa atong katilingban. Ang atong pagsalig sa Dios mao ang maghatag kanato ug kaisog nga manginlabot diha sa hustisya ug kalinaw. Ato usab nga ipakita ang atong paghigugma sa atong kauban nga mga magtotoo aron dili sila mahadlok nga moduol sa Dios ug makab-ot usab nila ang kaayuhan.

Karong adlawa, gihagit kita sa pagpaminaw sa panginahanglan sa katawhan tungod kay dili man kita mga bungol. Gihagit usab kita sa pagsulti sa tinuod ug mobarog nga lig-on kay dili man kita mga amang. Ayaw na pagpaka bungol! Paminaw sa mga nanginahanglan bisan kadtong wala nila gisulti. Adunay uban nga looy na gyud kaayo. Sa una palang nimong tan-aw, bisan wala pa sila mosulti mailhan na nimo nga sila nanginahanglan. Tabangi sila! Aron dili ka ingnon nga bungol bisan makadungog. Listen to what they are not saying!

Tabaaaang namo!