30TH SUNDAY IN ORDINARY TIME YEAR B

MALAS UG SWERTE!

Aduna akoy usa ka ig agaw kaniadto nga usa ka buta. Nabuta siya tungod sa iyang pagpanarbaho: usa siya ka tig vulcate sa ligid sa sakyanan. Usa ka higayon niana, nagvulcate siya sa usa ka ligid ug sa dihang kalit miboto ang ligid ug ang iyang mata ang naapektuhan, kini mao ang hinungdan nga dili na siya makakita. Simple lang siya nga tao, laagan bisan buta. Magsige siya ug anha sa among balay kaniadto, aron mangutana kon unsa ang migawas sa swetres ug mangayo ug sigarilyo. Usahay binuangan siya sa mga silingan. Looy gayud ang iyang kahimtang kay dili naman siya makakita.

Kon kitang mga tawo makakita ug mga buta makaingon ta! Kamalas niining tawhana! Dili makakita! Gihikawan sa kahayag! Pagkalooy niining tawhana! Apan bisan malas man ang ilang kahimtang swerte naman sila sa mata sa Dios. Ang buta layo sa sala tungod kay dili man sila makakita! Ang buta dili makapanaway tungod kay dili man nila Makita ang salawayon nga buhat. Ang buta dili dali matintal tungod kay dili man nila Makita ang butang nga makatintal. Buta sila nga malas apan buta sila nga swerte sa Dios!

Maayong adlaw!!!!

Ang ebanghelyo karong adlawa naghisgot kang Bartemeus nga usa ka buta. Si Bartemeus naglingkod daplin sa dalan, apan sa pagkadungog niya sa kaguliyang sa mga tawo ug sa paglabay ni Hesus misinggit siya ug nagpakilooy sa Ginoo aron mamaayo. Si Hesus nga nahibalo sa iyang gusto miayo kaniya ug si Bartemeus nga naayo misunod kang Hesus.

Sa atong kinabuhi, usahay susama kita sa buta. Usahay kon moabot ang malas, looy  ang atong kahimtang, daw nagpangapkap kita sa kangitngit. Sama pananglit  kon moabot ang dakong problema di ba! Makaingon ta unsaon man nako ni? kalisod ba ani mangita sa solusyon? Mura pod tag buta! Daw ngitngit ang kahimtang.

Mga igsoon, usa ra ang gikinahanglan nato kon moabot kining susama niini nga kahimtang. Singgit ug tawag sa Dios aron tagaan ka niya sa kahayag nga maoy mobanwag kanimo! Salig lamang ug ayaw pag undang sa pagsangpit sa Dios bisan pa sa mga hulga sa atong palibot. Di ba si Bartemeus wala moundang sa pagsinggit  bisan gibadlong siya sa mga tawo? Mao usab kini ang atong buhaton, ayaw pagpakawala sa paglaum, ampo ug ayo, ayaw pagsurender kay ang Dios nahibalo sa tanan. Kon moabot ang malas sa imong kinabuhi, dawata kini ug paningkamot nga mawala kini kanimo pinaagi sa imong pagpaningkamot uban sa pag ampo. Kini mao ang gibuhat ni Bartemeus nga usa ka buta: misinggit siya ug naningkamot nga miduol kang Hesus aron lang makaplagan niya ang iyang gipangita. “Moabot man gani ang malas nga wala gipangayo, swerte pa kaha nga kanunay giampo”(Fr Angel Comabig). Busa kinahanglan nga kita kanunay mag ampo sa Dios aron moabot ang swerte nga kahayag luyo sa kangitngit. Kon moabot ang malas dawata! Ug pag ampo aron ang swerte anaa.