23RD SUNDAY IN ORDINARY TIME YEAR A

ESTORYAHE SIYA!

The biggest problem in our society today is conflict. Mao kin ang kasagaran natong Makita ug madungog sa telebisyon. Tungod sa conflict daghan kaayo ang nangamatay, nagkabulag, nabungkag nga pamilya ug uban pa. tungod niini aduna kitay gihimo nga mga “peace talk” mga panag estoryahanay  sa matag grupo.

Mga igsoon, ang atong ebanghelyo karon naghisgot ug pagpasaylo o paghusayay. Atong nadungog sa atong ebanghelyo ang tulo ka pamaagi nga gihatag sa Ginoo aron mawala ang conflict.

1.        kon adunay sayop ang imong igsoon, tawga siya ug ipakita ang iyang sayop,

2.        kon dili mamati pagdala ug duha o tulo ka witness

3.        kon dili pa gayod siya mamati isumbong sa simbahan ug

4.        kon dili pa gayod isipa siya nga usa ka langyaw.

Kon atong pamalandungan ang atong ebanghelyo karon kini nagdasig kanato sa pag undang sa pagpakig away. Ang Ginoo dili gusto nga adunay kagubot o conflict mahitabo tali sa iyang mga binuhat.

Usa ka higayon niana, naglagot ko sa akong kauban nga pari. Daghan ko ug rason nganong nga naglagot. Busa nag-estoryahanay mi nga kami rang duha. Didto nako napagawas ang tanan nakong pagbati, mga  kalagot ug siya usab misulti sa akong mga nabuhat nga dili maayo. Human sa among panag-estoryahay nawala ang akong kalagot. Mao na nga friendship name hangtud karon, kay gi estoryahan nako siya.

Mao kini ang giingon ni Hesus sa iyang pagtudlo kanato: Kon adunay sayop ang imong igsoon, tawga siya ug ipakita ang iyang sayop. Estoryahe siya!

Ang kasagara nga buhaton sa tawo kon siya maglagot o makakita ug away iya kining ipanabi sa uban, kana bitawng “libakon” niya. Ang libak dili makauli sa inyong panag igsounay makasamot hinoon kini sa kagubot. Busa kon aduna kamoy gikalagutan? Ayaw ninyo libaka! Estoryahe siya!

Unsa may pulos anang imong pag ampo kon ikaw adunay kalagot sa imong isig kaingon? Wala busa estoryahe siya!  Unsa may pulos anang imong pagsimba kon ikaw nasuko sa imong isigkaingon? Wala gayud, busa estoryahe siya!  Unsa may pulos nianang imong pagpangalagad kon ikaw adunay pagdumot sa imong isigkaingon? Wala gayud kanay pulos, busa estoryahe siya!

Ang Ginoo naghagit kanato karon sa pagtapos nianang mga kalagot, pagdumot nga imong gibati sa imong kaugalingon. Ang pagtapos niini mao ang pag estorya kaniya, busa estoryahe siya!  

Sa bata pa ako kanunay lamang akong daugdaugon sa akong klasmet. Mao na segi lang kami ug sumbagay. Nisaad ko sa akong kaugalingon nga kinahanglan nga makabalos ako usa ka adlaw niana. Tungod sa maong pagdumot ni eskwela ko ug karate aron ako makabalo ug makabalos sa akong klasmet. Tuod man nahuman nako ang karate apan sa hinayhinay usab nawala ang akong pagdumot tungod sa akong pagkakita sa iyang kahimtang. Looy na kaayo tan awon ang akong klasmet niwang na kaayo ug buotan napod. Ug ako usab nakapamalandong nga dili maayo nga manimalos ko kay kabalo nako ug karate! Nagkita kami ug kausa nalooy ko ug samot mao nga ako siyang giduolan ug akong gikumusta ug gi estoryahan didto nawala ang akong kalagot kaniya.

Ang pagdawat sa atong mga igsoon ug ang pagpasaylo nindot nga buhaton kay mogaan ang imong pagbati kon ikaw makabalo nga mopasaylo, ilabi na kon maestorya nimo ang tanan nimong gibati. Ayaw kaulaw! Ayaw kahadlok! Estoryahe siya! Estorya nga dili makalagot kaniya kon dili makahulip usab sa iyang gibati, pag estoryahanay kamo!

Estoryahe siya…