5th SUNDAY IN ORDINARY TIME YEAR B

TAWHANON, “BULANON”, ESPIRITUHANON

Ang pinaka common nga sakit karon sa atong katilingban mao ang hilanat. Ang hilanat dali ra nga maulian, tumaran lamang kini ug tabletas, ipakaon dayon ug biscuit paresan ug orin. Kini nga sakit atong pagatawgon ug sakit nga tawhanon- meaning physical sickness, sakit sa lawas. However, there is also another sickness and I will call it  “Bulanon”, sakit sa kinaiya o batasan. Maayo ang batasan kon mosubang ang bulan lkabi na kon full moon. Pero kon walay bulan sapoton. This is what we called “bulanon”. Aduna usay sakit nga espirituhanon. Kini nga sakit common kanatong tanan kay makasasala man kita. TAWHANON, BULANON UG ESPIRITUHANON mga sakit sa katawhan.

Ang atong ebanghelyo karon nagsaysay sa pag-ayo ni Hesus sa mga masakiton. Ang tanan nangaayo gayud tungod  sa gahum sa atong Ginoong Hesus ug sa pagtuo sa katawhan. Daghan ang mga tawo nga miduol kang Hesus tungod sa ilang mga kasakitan. Apil na usab niini ang mga gipangyawaan, kinI sumala pa sa atong ebanghelyo.

Mga igsoon, ang atong ebanghelyo karon nagdasig kanato sa paglikay sa sakit nga espirituhanon. Ang tanan nga nagtuo sa espirituhanon nga sakit nga mao ang sakit sa atong kalag, makasinati ug kahupayan kon moduol kita sa atong Ginoo. Asa man? Sa simbahan mga igsoon adunay sakramento nga nagdasig kanato sa pagpatambal sa sakit sa pagpakasala. Pinaagi sa sakramento sa pagpakumpisal maayo kita sa mga sakit sa atong kalag. Ang sakramento sa kumpisal nga giandam sa simbahan, nagtudlo kanato sa pagpakig-uli sa Ginoo. Kini maghupay sa balatian sa atong kalag. Busa gidasig kita sa pag-apil ug paghimo sa kumpisal.

Ang sakit nga tawhanoin maayo sa mga tambal, doctor ug uban pang mga medisina nga anaa sa atong palibot. Kon ako magsakit ko kaniadto, tabonan lang ko ni mama ug habol dayon butangan dayon sa ilalom ug nag-aso nga init nga tubig nga adunay mga sagol nga mga dahon ug uban pa. kini makapaayo sa sakit sa akong lawas.  

Ang sakit sa lawas dili makaapekto sa  sa sakit nga espirituhanon makadasig hinoon sa atong espirituhanon nga kinabuhi.  Apan kon ikaw adunay sakit nga espirituhanon halos tanan maapektuhan niini: tawhanon, bulanon ug uban pang sakit.

Mga igsoon, gidasig kita karon nga kon unsa man nga klase ang atong kasakitan moduol lamang kita sa Dios aron kita mamaayo. Ang Dios naghimo ug mga instrumento dinhi sa kalibutan aron sa pag-ayo sa atong mga balatian. Sama pananglit sa mga doctor nga mao ang expert sa sakit sa lawas; Sama sa pag-apil sa mga formation nga gihatag kanato aron matambalan ang sakit nga “bulanon”; sama sa mga pari aron matambalan ang sakit nga espirituhanon.

Kon unsa man nga klase ang imong sakit karon: tawhanon, “bulanon”, o esprituhanon ayaw na paglangan sa panahon, duol sa Dios nga makagagahum karon dayon aron imong maangkon ang kalipay’ng dayon.

Amen!