PALM SUNDAY YEAR A

PAG-ANTOS? KAYA MO YAN!!!

Adunay usa ka mag-uuma nga nagtanum ug kawayan sa iyang uma. Sa dako na ang kawayan, iya kini nga giputol. Sa iyang pagputol mireklamo ang kawayan. “nganong imo man ako nga giputol?” “Sakit kaayo kana alang kanako”, miingon ang kawayan.

Mitubag ang mag-uuma: “Giputol ko ikaw tungod kay gihigugma ko ikaw.”

Pagkahuman ug putol sa mag-uuma sa kawayan iya kining gidala sa ilang balay ug didto iyang gikuhaan sa mga salingsing(sanga) ang maong kawayan.

“giputol nako nimo sa akong punuan, imo pa gayud nga gikuha ang akong mga kamot, mga sanga! Ngano nga imo man akong gisakit?” Mireklamo ang kawayan.

“Tungod kay gihigugma ko ikaw”, mitubag ang mag-uuma.

Pagkahuman ug putol sa mga sanga, giputolputol sa makatulo sa mag-uuma ang kawayan tungod kay taas man kini. Mireklamo na usab ang kawayan.

“giputol nako nimo sa akong punuan, imo pa gayud nga gikuha ang akong mga kamot, mga sanga! Ug karon imo pa gayod akong giputolputol sa makatulo, grabe na ang pag-antos nga akong nahiaguman”, miingon ang kawayan.

Ang mag-uuma mitubag: “giputolputol ko ikaw sa makatulo tungod kay gihigugma ko ikaw.”

Pagkahuman ug putolputol sa makatulo, giduslak sa mag-uuma ang mga buko sa sulod sa kawayan aron mabangag kini. Mireklamo ang kawayan.

“giputol nako nimo sa akong punuan, imo pa gayud nga gikuha ang akong mga kamot, mga sanga! imo pa gayod akong giputolputol sa makatulo, ug unya giduslak pa gayud nimo ang akong mga buko! Dili na nako maantos ang kasakit nga akong nasinati.

“Giduslak ko ikaw tungod kay gihigugma ko ikaw”, mitubag ang mag-uuma.

Natingala ang kawayan kay gipas-an siya pagbalik sa mag-uuma ug mibalik didto sa uma. Pag abot sa uma nakakita ang mag-uuma ug usa ka tuburan (spring) diin adunay nag- agas nga tubig. Didto gitaud sa mag-uuma ang kawayan ug miagas ang tubig gikan sa tuburan ngadto sa uma ug nabuhi ang tanang mga tanom sa uma.

Greetings!

Mag igsoon, karon mao ang gitawag nato ug palm Sunday. Nagbendisyon kita ug mga lukay isip paghandum sa nahitabo kaniadto sa pagsulod ni Hesus sa Jerusalem. Karon usab nga adlaw gitawag nato ug Passion Sunday tungod kay ato mang gibasa ang Ebanghelyo sa pagpasakit sa Ginoo.

Matud pa sa mga batid nga magsusulat, ang pasyon sa atong Ginoo dili estorya sa kasakitan ni Hesus kon dili estorya sa dakong gugma sa Dios kanato. Kini tungod kay sa iyang mga kasakit naluwas ang tibuok kalibutan.

Kita nakasinati usab ug mga kasakit sa atong kinabuhi. Daghan kaayo kini nga daw malumos na kita sa pag-antos . daghan kaayo ang hinungdan sa pag antos. Adunay uban nga nag-antos ug nasakit tungod sa ilang paghigugma sa uban. Sa pagsulat nako niining homiliya, adunay kalit nga naghangyo sa pagpasantala, miundang ako sa pagsulat ug miadto dayon ako tungod kay akong nahibal –an nga anaa na daw sa ER. Akong nahibal-an nga sulod sa walo katuig na diay naghigda sa katre ang maong inahan. Apan ang pamilya wala moundang sa pagsuporta sa ilang inahan ug nag antos gayod sila pag-ayo. Kini sila nag antos tungod sa ilang paghigugma sa uban.

Adunay uban usab nag antos ug nasakit tungod sa ilang hiwi nga mga binuhatan. Sama pananglitan sa mga tawo nga napriso tungod sa mali nga binuhatan.

Adunay uban usab nag antos tungod kay aduna silay personal nga gusto nga mahitabo sa ilang kinabuhi.

Karong domingoha, gihagit kita sa pagpamalandong sa mga pag-antos nga atong nasinati karon. Unsa man kana nga klase sa pag-antos? Tungod ba kana sa gugma? Hiwi nga binuhatan? O personal nga interests lamang?

Sama sa kawayan nga  nag-antos aron makatabang sa tanang nanginahanglan nga mga tanom. Atong hinumduman nga si Kristo nag antos alang kanatong tanan. Tungod kini sa iyang dakong gugma kanato. Ikaw? Unsa nga klase ang imong pag-antos?

 Kaya mo ba yan? Moingon ako: kayanin mo yan! Kasi ang Dios ay palaging nandiyan.”