CHRIST THE KING SUNDAY YEAR A

JUDGMENT DAY

Usa ka mag-uuma ang nakadungog nga ang ilang hari hapit na mamatay ug nagpatawag sa tanang kalalakin-an sa iyang gingharian aron mopili kon kinsa ang mamahimong sunod nga hari. Busa, bisan sa kalayo sa iyang lugar miadto siya aron pagbisita sa buotang hari.

Didto sa palasyo, nangabot ang daghan kaayong mga kalalakin-an: adunay mga adunahan nga maayo kaayo ug pustura ug daghan usab ang mga pobre. Iyang nakita ang daghan kaayong mga tawo nga nanulod sa gate sa palasyo. Sa dihang gusto na unta siyang mosulod iyang nakita ang usa ka makililimos didto sa daplin sa gate nga nangayo ug pagkaon sa mga nanglabay tungod kay gigutom. Gilabaylabayan lamang siya sa mga tawo. Sa duol na siya nangayo kini kaniya ug pagkaon, tungod kay aduna man siyay balon nga gamay iya kining gihatag ug mikaon ang makililimos. Iyang nakita nga gisi ug bulingon na usab ang sinina sa maong makililimos busa iya kining gihatagan ug sinina ug mipadayon siya sa pagsulod.

Didto sa hawanan sa palasyo iyang nakita ang daghang mga tawo nga mogawas ug musolod sa kwarto sa hari. Sa dihang siya na ang misulod kalit siyang natingala tungod kay didto sa lingkuranan sa hari iyang  nakita nga naglingkod ang makililimos nga iyang gitabangan sa gawas ug ang sinina nga iyang gihatag mao usab ang sinina nga gisul-ob niini.

Ang hari miingon: “karon mao ang paghukom kon kinsa ang mamahimong hari” “ania sa inyong atubanagan ang mosunod nga hari sa akong gingharian, ang tawo nga  mitabang kanako didto sa gate sa palasyo samtang nagpakilimos ako.”

Mga igsoon karong adlawa atong gisaulog ang kapistahan sa Kristong hari. Diha sa atong ebanghelyo, gihulagway ni San Mateo si Hesus nga mao ang maghukom sa tibuok nga katawhan. Iyang ilain ang mga karnero sa mga kanding, nga sa ato pa ang mga maayo ug mga dautan. Mao kini ang gitawag nato ug judgement day sa umaabot nga panahon.

Sa umaabot nga panahon kita pagahukman sa Dios kon kita angayan ba sa iyang gingharian o dili. Simple lang ang iyang gikinahanglan para kanato: kinahanglan nga atong ipakita ang atong pagtabang niadtong mga tawo nga nanginahanglan, ilabi na gayud niadtong mga  naglisod nga katawhan. “gigutom ako ug inyo akong gipakaon, giuhaw ako ug inyo akong gipainom, nabilanggo ako ug nagsakit ug inyo akong giduaw”.

Mga igsoon mao kini ang gikinahanglan sa Dios diha kanato ang pagtabang nato sa mga tawo nga nanginahanglan. Hapit na ang pasko ug daghan na ang manganta diha sa inyong tugkaran aron sa pagpangayo sa inyong hinabang. Unsa man kaha ang imong buhaton niini? Daghan ang mga tawo nga gigutom,. Nakapaambit kaba diha kanila? Daghan ang mga nag-antos tungod sa mga kasakit, problema, kalisod, naminaw ug mibisita ka ba kanila?

Sa umaabot nga panahon pagahukamn kita sa Dios. Sigurado ka ba nga adto ikaw sa mga karnero o adto ba hinoon ikaw sa mga kanding diin gipanghimaraot sa Dios. Judge yourself: karnero o kanding? Maayo ka ba o dautan?

Today is judgment day!