ALL SOULS DAY

NOBODY IS PERFECT

Kagahapon atong gisaulog ang “All Saints Day”- ang mga magtutuo nga nakatagamtam sa himaya sa langit tungod sa ilang mga maayong buhat sa dinhi pa sila sa kalibutan. Karong adlawa atong gisaulog ang “All souls Day” – ang atong mga kaigsoonan nga nangamatay nga dili pa ready for the full fellowship with the Lord didto sa langit.

Kitang tanan nga mga kristianos mituo sa gitawag nato ug four last things: kamatayon, paghukom, langit ug imperno. Ang purgatory nga atong gituohan wala matawag nga kauban sa four last things , ngano man? Tungod kay ang purgatorio kabahin sa langit, part of heaven. Ang porgatorio alang sa mga kalag nga angayan malangit pero tungod sa gagmayng mga sala kinahanlan nga hinluan pinaagi sa purgatorio. Dili pa sila pwede nga mosulod sa langit tungod kay ang Ginoo nag-ingon diha sa Revelation 21:27 walay mosulod sa langit nga dili limpyo.

Apan daghan ang supak niining pagtulun-an sa porgatorio, ilabi na ang ubang mga sekta. Miingon sila “wala sa bibliya ang porgatorio” tinuod kana walay pulong nga porgatorio diha sa bibliya apan adunay porgatorio  ug ako kining pamatud-an kaninyo.

Una, atong mapamatud-an ang porgatorio sa sambingay mahitungod sa dili masaligan nga sulogoon (Unfaithful servant). Sa katapusan sa maong sambingay  nagaingon nga ang mga sulogoon nga nakabalo sa gisugo sa amo ug wala magtuman niini silotan sa bug-at nga kastigo apan ang mga sulogoon nga wala makabalo sa ipabuhat sa amo apan nagbuhat sa ingon makadawat ug gaan nga silot(Lukas: 12:47-48). Kon kadtong gisilotan ug bug-at ma imperno, asa man diay ibutang ang mga gamay ug silot? Mao kana ang porgatorio.

Ikaduha, 1 Cor. 3:14-15 nagkanayon: “kon ang gitukod sa tawo diha sa patukuranan dili masunog, makadawat siyag ganti. Apan kon masunog kini, mahanaw kini gikan kaniya apan maluwas siya sama ra nga nakalatas siya sa kalayo.” Sa adlaw sa paghukom unsaon man pagkawala sa kalag nga maluwas raman gihapon pinaagi sa kalayo? Ang tubag: Porgatorio.

Ikatulo, sa 1John 5:16-17, gihisgutan ni Juan nga adunay sala nga mulungtad sa kamatayon (Mortal Sin) ug adunay sala nga dili Molungtad sa kamatayon(Venial sin) nga pwede pang maluwas. Ang tanang mga tawo nga walay sala modiretso sa langit, ang tanang tawo nga adunay mortal sins diretso sa imperno; karon asa man sa Dios ibutang ang mga tawo nga gamay ra ug sala nga pwede pang maluwas? Ang tubag: Porgatorio.

Kon ang ubang sekta dili motuo sa porgatorio, nganong mag-ampo paman sila sa mga patay? Walay pulos ang ilang pag-ampo kay ang tawo nga tua na sa langit dili na kinahanglan ug pag-ampo, kon ang tawo tua napod sa impierno dili napod matabang sa pag-ampo.

Mga igsoon, nobody is perfect ug kini gipamatud-an diha sa bibliya. Mao nga kinahanglan nga mag-inampoay kita sa atong tagsatagsa ka mga kalag.