Ash Wednesday (2014)

GO BACK TO THE ORIGINAL

Nakahinumdom ko kaniadto kon maglimpyo ang akong mama ug kaldero ang iyang gamiton kining abo. Kon gamiton na gani ang abo mobalik gayud pagkasinaw ang kaldero, mura siyag mobag-o pag usab. Kaniadto mga igsoon ang abo mao ang ilang sabon nga gamiton sa pagpanglimpyo. Mao nga kini ang gitawag nilag “the oldest soap”.

Karong adlawa gisaulog nato ang ash Wednesday, diin kitang mga katoliko pagabadlisan sa abo aron sa pagpahinumdom kanato sa paglimpyo sa atong kaugalingon(“Repent, and believe in the Gospel.”) ug magpahinumdom usab kanato kon asa ta gikan didto usab kita balik(“Remember that you are dust, and to dust you shall return.”) .

Mga igsoon, niining panahon sa kwaresma mao ang panahon diin kita gitawag sa pag bag-o sa atong kaugalingon. Sama kini sa abo diin iyang limpyohan ang kaldero nga naitom na sa kahugaw aron mobalik ang original niini nga hulagway. Mao usab kini ang atong buhaton niining panahon sa kwaresma, atong ipabalik ang original nato nga pagkakita – gikan kita sa Dios nga balaan busa kita usab usa ka balaan, mao kini ang original nga pagkakita. Ang atong ebanghelyo karong adlawa nagpahinumdom kanato sa pamaagi kon unsaon sa pag bag-o sa kaugalingon: Paghatag sa mga kabos, pag ampo, ug pag puasa.

Paghatag sa mga kabos- panghatag sa mga nanginahanglan labi na niadtong wala gayoy ilaha pero ayaw na pagsaba ato ato ra ni!

Pag ampo pod! – didto man ta sa iya gikan balik pod ta sa iya.

Pagpuasa -       sakripisyo pod gamay alang sa uban.            

Ready naba mo sa pag bag-o? Badlisan ko na ang agtang ninyo.